一班三十歲被選中嘅細路，一班老屎忽麻甩佬，一齊匿喺戲院入面喊
今日去咗睇《數碼暴龍 last evolution 絆》，睇預告都知道係『最後』進化，所以未入場前我都知實會有感動位令人喊，所以我都同自己打定底，有哂心理準備，我同自己講:「無嘢嘅，男人老狗邊會咁易喊呀!」
買飛時侯嚇咗一嚇，竟然差唔多爆場?
睇得數碼暴龍嘅，都係90後，估唔到呢次 " 最後召集 " 會咁多人睇。
入場後，觀望四周，大部份都係男人，其次都係情侶，雖然係一套動畫，但全場目測只有一個細路。
我老婆一次數碼暴龍都未睇過，佢連亞古獸係咩都唔知，但佢為咗睇我個「喊樣」，所以佢都陪我睇，而我坐車去睇之前用盡力氣同佢簡單講解數碼暴龍係咩一回事。
內容上唔想劇透，但記得準時入場，因為一開波就黎料。
而大家睇預告片都大概知道故事係講啲咩，大概係被選中嘅細路不斷長大成人後，作為拍擋嘅數碼暴龍就因為你嘅成長而慢慢消失......呢個就係殘忍嘅宿命。
呢套電影基本上可以為數碼暴龍01作為完結，亦都為我地一班90後嘅童年作真正完結
入面內容大概都包哂以前01好睇嘅元素...例如 兩首熱血歌Butterfly同Brave heart。
作為由童年睇開嘅你，好多回憶番哂嚟
而我，亦都失守
眼淚失控地流，喊到仆街，口罩都喊濕哂
全場觀眾嗚咽同哭泣聲此起彼落，特別係最後一幕
「太一...你長大了。」
「明天行程呢...明天做咩好....明天...就一起............」
然後....相信呢個位就算大家之前係點忍住唔喊都好，都忍唔到吧?
太一同大和忍唔住崩潰式地喊時侯
我都忍唔住握緊拳頭跟住喊了
完場一刻
全場觀眾拍哂手掌，我呢世人入戲院睇，過去只有一次遇到全場拍手，就係復仇者聯盟大結局
我相信呢堆掌聲，係致我地逝去的童年，感謝數碼暴龍01喺我地童年出現，感謝和田光司嘅歌
各人離開座位走時，前面有個家庭，爸爸已經一直坐喺到低頭地喊，身旁大約五、六歲嘅小朋友天真地笑:「爸爸喺到喊呀!走未呀走未呀!」似乎呢個細路睇完套野都唔知講咩，一臉沒趣。
而媽媽呢個時侯拍一拍個小朋友，然後話:「比爸爸喊埋先。」我諗佢老婆點諗都諗唔到佢身邊個男人竟然為咗隻亞古獸而喊。
而爸爸繼續哭泣....放心吧，無人會介意，因為在場唔係得你一個男人喊。
呢個時侯，我又再次忍唔住......
無論我地幾咁唔想成為大人，但我地都唔能夠逃避，人一定要前進。
正如電影入面所講，我地唔可以單純咁接受別人為我地選擇嘅未來
我地仍然仲有好多未來，好多無限嘅可能性
當電影入面播住歌回憶返01主角嘅童年經歷，我腦海都好似走馬燈咁，回憶返細過放學即刻跑返屋企睇，亦都儲錢買數碼暴龍機....亦都同身邊嘅好朋友對戰...
數碼暴龍入面嘅角色，就係我地童年，我地同角色一樣，成長了，變成大人了，開始放棄童年嘅任性、再無任何冒險，開始要面對現實，要搵工，要賺錢，要面對無奈....無論亞古獸又好，身邊嘅朋友都好，不知不覺間已經忽略咗佢地，正如太一所講
" 亞古獸無變，變嘅係我 " ，即使想點樣維繫返關係，已經太遲了
所以大家一定要好好珍惜身邊嘅人同事
唔好一副理所當然存在...
連生存喺我地童年嘅亞古獸都要消失時侯
我地喊都已經太遲
我喺到諗，長大變成大人係咪一定要放棄童年嘅自己?
變成大人係咪就失去仲係細路嘅「可能性」?
呢個就係我地現實上嘅宿命?
定係
我地仍然保持住童年嘅可能性，而變成更多可能嘅大人嗎?
雖然我地會長大，童年會不再，但係我地嘅心仲係可以在一起，面對困難，我們亦可以勇敢地跨過。
手足們，無論目前我地面對幾咁巨大嘅挑戰
我們都會一直在一起
只要保持住可能性....最終一定戰勝一切
Search